上星期辛苦完，呢個Weekend我只想hea…..
最開心的hea，莫過於煲雜誌及煲碟。近日被我煲得最熱的，當然係我超級偶像Leslie兩隻 “掠水” collection內的DVD。雖然話掠水，我咪又係係唱片舖一見到，價錢都無睇就去俾錢。作為一個忠實Fans，CD入面的歌，我無理由無齊，我有個D，仲有好多係絕版CD，hehe。但個D DVD，正！我最鍾意1988年十大勁歌金曲羅最受歡迎男歌星時候，跳個隻 “側面” 。呢D就叫 “揮晒自如、巨星風範”。我點會滿足於睇一首歌呀！咁梗係找番晒d十大勁歌金曲的VCD出黎羅。雖然依家已經幾十歲人，但一見到Leslie，我就自不然返去做番個Fans。今日我睇番D VCD，見到皺皮倫羅最受歡迎男歌星，我仍然會噓羅！
做得Fans，咁阿Leslie真係帶俾我好多回憶
第一次入紅館 – 我第一次去紅館，就係睇Leslie 85年第一個個唱，我張飛同演唱會特刊，就保留到依家，呢，全賴有你那個唱片封套。我記得9X年時，我去信和買番D Leslie舊VHS，個老闆聽見我有呢本絕版特刊，話願意用$1000同我收。嘩，好難！個本特刊D相好靚仔架嘛。多多錢都唔賣呀。
英雄本色 – 英雄本色一上晝，我連同學都難約，捉左小弟陪我去睇。嘩，我去麗聲戲院睇，賣飛條龍打蛇餅打到凱聲戲院，即係今日圍住始創中心一個圈。熱辣辣三十幾度，排左成個幾鐘先買到兩張飛。但套戲咁好睇，值晒。最老土係睇完套戲不久，我同細佬係樓下食魚旦粉，見到狄龍，小弟叫佢豪哥，佢話佢係傑仔(佢又真係叫阿傑) 。感覺係…. 好瘀！但狄龍好Nice呀，咁小弟個時肥嘟嘟，又幾可愛的。
胭脂扣 – 我中學時有個好同學叫Donna，同我一樣係Fans，但佢咪梅艷芳。咁胭脂扣上晝，梗第一時間去睇喇。睇完，我地唔知點解見到一架去石塘咀的巴士，就係咁中左上去。俾見到如花同十二少掛！
儂本多情重播 – 儂本多情正式播映，係1984年6月，個時Leslie未唱Monica，人未紅，我亦未成為佢Fans。到1985年，儂本多情於午間重播，咁我個時已經係Fans。因為個時已考完試，等放暑假，咁早放學。我為左準時返屋企睇儂本多情，我日日係深水步地鐵站跑番屋企，日日跑到氣來氣喘。好在套戲得十集乍！
見到Leslie呀 – 我唯一一次見到Leslie真人，竟然係溫哥華！地點係Main街間春秋食館，嘩，我見到Leslie呀! 我同阿媽及小弟都呆左，唔識俾反應。阿媽叫我去叫佢羅簽名，我嚇到傻左，鬼識郁咩！
Leslie拉闊 – Leslie開過一千零一次拉闊。我都無咁張信用卡，邊有分換飛。咁我即刻找agency老友、舊老闆找。終於找到兩大張！咁我梗約另一超級Fans老秘去睇。阿老秘去之前，叫我記住要裝備好，要用斜X袋同拎支水。我地兩個入場，無諗過個位咁前，有得睇已好開心，仲要前。後黎唱個堆經典快歌，其他Fans已衝出去，我地就立即衝埋出去，嘩，原來斜X袋真係咁好，我地不用理個手袋，盡情大喊大叫，有支水潤下喉。D 實Q叫我地唔好” 琴” 欄，要我地返埋位。我隔離個女Fans鬧返個實Q : “依家唱緊Standup呀” 。我同老秘梗無返埋位，繼續琴欄喇！
情熱演唱會 – 經過拉闊熱身，呢個演唱會更不得了！老秘一早book定靚位，因為三面台，我地坐到樓下。快歌Medley那part，全場歌迷癲左，我地梗係癲左。我地周圍坐住D日本Fans，仲癲過我地。我地無理由咁失禮，半場又叫又跳，終於第二日左! 睇演唱會睇到病，真係 “第一次”!
今年係我成為Leslie Fans 25週年記念，嘩，銀禧呀！
Apr 5, 2009 10:09 pm