好多老友話我好耐無update個Blog，係呀，近排真係好忙。最慘唔係phyiscally忙，係mentally忙。我根本返到屋企，個腦已經唔識運作。老實，之前好想搬出黎住，但經過呢個幾月的mentally辛苦，可幸屋企有老爸同老媽，老媽煲靚湯，補下我個腦同個樣，老爸呢，我做得辛苦，一定找老爸呻，老爸未必明白我公司環境，但點都係江湖行走幾十年，佢有D觀點係好的，同埋，老豆梗係永遠企係我個邊架。其實唔係有乜意見，但俾我出下氣都好。有時返到屋企，無聊同老爸老媽吹下水，已經係最大的減壓！我雖然老友記多多，但真係tired到，連打個電話都無gas。
Mentally忙，主要梗係工作喇。之前，做n咁多樣野，我已煩死，點知上月尾，公司有大人事調動，生產大隊受牽連。我要預備好多資料，真係做死我呀！當中，亦有好多uncertainty，好多唔知點解，我顧及養娘，又要顧及生產隊員。真係頭都痛埋。乜事都好，我最怕兩頭唔到岸，依家一切塵埃落定，我反而舒服晒，知道下一步點行。
有乜變動？阿爺話，要生產大隊跟番阿親生老豆，名正言順以”集團”身份現身。呢兩個禮拜，就係去攪回歸的野，真係忙到甩碌。養娘又找我，親生老豆又刮我，
已落實回歸日跟番個親生老豆。做左私生大隊咁多年，大隊已經建立左自己的江湖地位，expertise、制度同文化。真係唔係一時三刻可以適應親生老豆的野。親生老豆都俾不錯的自由度俾大隊的 (先改為5天工作!)。但係，生產大隊發展到呢個地步，我個人覺得阿爺安排，對大隊長遠行好的。畢竟，養娘有太多野要顧喇。
睇番咁多年黎，我都經歷過幾個大轉變。變緊個時，當然不安，當然覺得危機處處。但之後睇番，每個轉變，其實都係一個機會黎架。有危先有機嘛！
生產大隊會繼續努力，本年度第一季，已創下佳績，一班隊員辛苦晒，希望回報令大家都覺得物有所值。
我就放四日假，精精神神面對這個大日子。
Jun 29, 2008 10:25 am