我覺得2008年對我黎講，好精彩呀！嘩，發生左好多我始料不及的事，以前幫我、睇我的，一夜間變晒臉。從前互不相干的，今日竟然企係同一陣線。世事原本真係咁，無一世敵人，亦未必有一世朋友。
我大難不死，真係算好好彩。我份人，機關唔識算，都係一味有野就做，叫我諗D咁複雜的利害同人事關係，真係頭痕。我仲勁到仍然係路見不平，拔刃相助，死多二錢。但不能不Thanks GOD，睇相師父話我八字有天乙貴人，仲坐係一個幾靚的位置。我覺得我出路遇貴人，小人當然不少，但貴人亦多呀。
我個人最滿意的係，令生產大隊安然過渡。老實，八號仔令我有restructure恐懼症，今次restructure，好似同以前係八號仔好似。我好記得第一次見完新老闆時，我搭落番自己個位時，我好想喊，但連喊都喊唔出呀。個時新架構未出，我未講得出黎。舊老闆已經唔理我，新老闆又未理得我住，一個人頂的滋味不好受。但另一方面，能今生產大隊適應新環境，能令新老闆接受我地，亦係我本年度最滿意自己的事。
今年去左兩次旅行，兩次都係去日本。信州那個Trip，真係好好好難忘。我無諗過咁樣去日本，好地道，完全無香港人去日本Feel，我亦認識另一個日本。最難忘係，我同小劉，去完大浴場，跟住攤係tatamei，飲住日本啤酒，聽住NHK日文旁述，睇住北京奧運開幕。去馬寵宿、妻寵宿，跟我認識的新宿完全唔同。我仲drive，drive右軑車對我已有一定挑戰，仲要係日本。呢個trip另一難忘地方，係我係三日內，流左一年的汗，真係好熱。個trip我要好多謝小劉的細心安排呀。
2008年對全世界的人都係一面天堂、一面地獄。年中大地震，不過三個月個奧運又俾李寧一個點聖火點番起；年頭講緊加人工跳蹧，年尾講緊凍薪裁員；年頭我業主大幅加我租最好我即走，年尾係你要租屋，大把你租最緊要好租客有價講。有無諗到舊年Twins仲羅到亞太區最受歡迎女歌手，今年，連組合銅獎都無過呀！
短短365日，不論世界大事抑或我自己事，認真係估佢唔到。
Jan 5, 2009 6:46 am