本來想叫做”給FreshGraduate的信”，但現在”信”呢個字已不合時宜，我也順應一下潮流，改為Post。你們一方面忙於考試，也忙於找工作吧! 近日很高興認識你地，有很多說話想同你地講。
問同學們有無夢想，大部份都有，但當問到想找份咩工，大部份同學都O左咀。其實我比你地更O咀。因為依家都5月，仲未知自己想做咩都幾大鑊。找工唔係打游擊，心態唔可以係”找到乜就做乜”。咁樣你會浪費好多氣力，行多好多寃枉路。首先想清楚自己想做乜先，唔知自己做乜，等如去shopping，唔知自己買乜野衫，去到boutique揀半日都揀唔到，因為根本唔知自己要乜。找工都一樣，你無目標，份份工都會覺得唔係幾適合自己。
依家科技先進，人人都手執一部Macbook或者ipad黎見工，入面都係介紹你地的功課。當然，功課會幫助我地認識你多d，但好老實，學校的功課，即使係同商業機構做的，放係現實世界都要執執先用得。我Final Year時，我個team羅過西北航空Marketing獎的第二名，畢業無耐我係agency serve番Northwest，先知自己份功課有幾幼稚。同埋，請得Fresh Grad，預左無經驗，所以，我地係睇人多過睇你d功課。介紹自己，突出自己，先係致勝為道。
我相信個個僱主都會好appreciate黎見工的人做足功課，知道間公司同個post做乜。奉勸各位同學要做好準備，要認識公司同行業背境，亦要知道個post係做乜的。同埋你認識間公司多d，interview個時都會自信d架。我畢業時一心只想入4As，我熟讀agency guide，有唔明我問Lecturer，到有得in DDB，我做足功課，大約知道佢地做乜野客。其實，interview係貴精不貴多，中就得，因為最後你只能做一份工。做足功課去interview，命中率都高D。
主動！有心儀的公司不坊寫封自薦信去，成功率未必高，但你唔寫成功率就一定係零。我畢業時寫左八封自薦信，有兩個interview，其中一個有offer，成績都唔錯架。
祝大家早日找到份開心又稱心的工作！